شروكه

تعريف الشروكه : هى تصغير لكلمة شراكه والشراكه هو عمل جماعي مشترك ....... طيب شنو اهى الشروكه ؟
الشروكه هو عمل جماعي مصغر ومنتشر بين بنات الكويت في المدارس من ايام الثمانينات .... طيب شنو اهو العمل الجماعي المشترك بينهم .

شله من البنات يتفقون على ريوق جماعي بحيث انه كل وحده فيهم تجيب صنف معين من المأكولات .... وكل طالبه من بنات الشله ما تروح المدرسه الا وماخذه معاها اكله معينه حق الشروكه ..... واول ما يدق جرس الفرصه .... الشله تجتمع في مكان صاد وهادئ في المدرسه وكل وحده فيهم اطلع اكلها ( العصير والكيك والساندويشات والكاكاو والشبس..... الخ ) ، بس طبعا ما في طاولة طعام ولا اسماط ولا شي ، تلاقونهم حاطين اكلهم على دجه ( دكه ) ، واللي واقفه واللي قاعده ، المهم انهم مسوين شروكه هذا اذا كان بره الصف.... اما اذا كانت الشروكه داخل الصف يقومون يصفون الأدراج والكراسي يم بعض ويرتبون الاكل على الطاولات .