الأنانيه وحب النفس

الانانيه وحب النفس

زميله لي في العمل .... بنت صغيره في ريعان شبابها ، أخذت منها موقف عمري وحياتي ما راح أنساه ، موقف يدل على انها أنانيه وما تحب الا نفسها

لما كنت بإجازة امومه وعندي طفل اصغير بعده ما كمل ثلاث شهور ، وكنت اقضي طول وقتي برعاية ولدي الصغير ولا تكون طلعتي الا مع زوجي وللحاجه القصوى فقط ، طلعتي من البيت صعبه وما كان عندي خدامه .... الخدامات ما يقعدون عندي الله قاردني مع الخدم .

وبذاك اليوم ولا رفيجاتي اللي في الدوام يتصلون عليي ، شالسالفه ، السالفه وما فيها ان انصرفت لي مكافأة اعمال إضافيه بالغلط ونزل أحسابي بالبنك ... والخطأ ان صار في لخبطه بالاسامي بيني وبين بنيه معاي بالقسم ، وقالوا لي ان البنت تبي افلوسها ويا اما انج تمرين الدوام وتعطين البنت افلوسها واذا ما قدرتي تيين الدوام ترى راح ينخصم من راتبج مع المعاش الياي ، بس البنت تبي افلوسها اللحين ، بس طبعا ظروفي ما تسمح لي اني امر الدوام واعطي البنت افلوسها ... خل تصبر على الشهر الجاي وينخصم من راتبي ويصرفون لها المكافأه .

البنت مصره تبيهم اللحين اللحين مو قادره تصبر ... انهالت عليي بالتلفون وقامت تتحجج عليي على انها بأمس الحاجه حق الفلوس على قولتها : ذروري ذروري انا محتاجتهم ابيهم اللحين ( اشماله محتاجتهم وانت بعدج بنيه لا وراج ولا دونج ) ، قلت ما كو الا زوجي يوصل لها الفلوس بس زوجي رفض وقال لي : تركيها اتولي ، والبنت مو راضيه تبطل تلفونات قامت تحن عليي ، آخر شي قالت لي : بمرج دليني على بيتكم ، قلت لها : شتمرين ما عندي افلوس في البيت لازم اروح البنك عشان اسحب الفلوس ، انا أهني استعطفت البنيه وكسرت خاطري لما قالت لي انها محتاجه ( انا المسكينه مو اهى )، وتواعدت معاها على ان نتلاقي عند البنك عشان مره وحده اسحب الفلوس واعطيهيا ، قالت البنت : اول ما اوصل البنك راح اتصل عليج .... وكيلكم الله ما نمت الظهر بالي مشغول في الفلوس واول ما اذن المغرب رحت على طول صليت وبعدين بدلت اثيابي وقعدت انطرها تتصل علي تلفون ، اللحين تتصل اشوي تتصل ، وينها هذه اللي تبيهم ظروري ظروري ، جان اتصل عليها ولا اثاري اطلعت الاخت نايمه ..... جان تقول لي : خلاص انا اللحين ببدل اثيابي وبروح انطرج عند البنك ماكو ربع ساعه وانا عندج في البنك ، جان افز على طولي واقط ولدي عند بنت اختي واروح انطرها عند البنك ..... اللحين تيي اشوي تيي ازرعتني عند البنك وينها هذه اللي محتاجه حق افلوسها ، واتصل عليها تلفون مره ثانيه ، جان تقول لي : خالاتي عندنا في البيت وامي طالعه وانا قاعده معاهم ما يصير اخليهم بعد ( ليش ماكو احد في البيت غيرج ، وينهم خواتح ) ، خلاص ربع وانا عندج في البنك ..... شوي جذي ولا تلفي عندي يم البنك ... طبعا ما يات الا كاشخه ونافشه الشعر وتارسه وجهها مكياج وملطخه براطمها حمره فوشيه هذا يعني على اساس انها بس ابتاخذ الفلوس وابترجع البيت عشان خالاتها ، واول ما شافت الفلوس ولا بسمتها من هالشق لي هالشق ، وخذت الفلوس وفشكت بسيارتها ( لابسه وكاشخه ونافشه الشعر ... معقوله هذه بترجع البيت ، ما استبعد انها راحت السوق عشان تتسوق) ، وبعدين اول ما رجعت البيت عند امي عشان آخذ ولدي من عند بنت اختي ولا الولد يفحط من البجي وبنت اختي متوهقه مو عارفه شلون تتصرف معاه .

احنا اساسا مقر عملنا في الاداره الماليه ..... طبعا البنت لما استلمت افلوسها مني حتى ما هزت من عمرها وتنزلت وراحت قسم الرواتب وبلغتهم انها استلمت افلوسها بطريقه وديه بيني وبينها والقسم كاهو قبال قسمنا ، واول ما خلصت إجازتي باشرة العمل من عقب ما دبرت لي خادمه ما اوتعيت الا مستقطعين قيمة المكافأه من راتبي ومنزلينه بحسابها .... وربي ما سكت عنها ونقيت افلوسي منها نق ، البنت تفشلت وما قدرت تواجهني من الفشله ، ولو ما انها عارفه نفسها شنو مسويا جان ما انحرجت .