سَحَرُواْ أَعْيُنَ النَّاسِ وَاسْتَرْهَبُوهُمْ

انا بطرح عليكم سالفة بوقه حصلت معاي بمعرض الكتاب ، واللي باقوني بنات اشكالهم تتراوح بين 16 الى 19 سنه .

من سنتين تقريبا وانا رايحه متعنيه معرض الكتاب مع بنتي ، وانا اتجول بين المكتبات من هالمكتبه الى هالمكتبه ، ولما دخلت حق مكتبة قصص الاطفال ولا بنات ثنتين وحده عن يميني والثانيه عن يساري ومعاهم طفله صغيره .... انا اهني استغربت من وقفتهم وامطالعهم حق قصص الاطفال واهم بالهالعمر وحتى الطفله اللي معاهم بعدها اصغيره ما تفهم شي .. والغريب انها تكلم الطفله اللي معاها وتقول لها : الله شوفي القصص تهبل ، والياهل اطالع وهى ساكته .. براءة الطفوله .

وطول ما انا واقفه مع بنتي اطالع القصص ، وهالثنتين يحومون داير ماداري .. ولاحظت ان في وحده ثالثه واقفه من بعيد مثل اللي تراقب ... بس انا حزتها ما خطر على بالي اني اتحذر من هالبنات .. بعد تدرون ان البواقين والنشالين مو بكثره عندنا بالكويت مثل الدول اللي يكثر عندهم الفقر .

وبمجرد ما ان خلصت من القصص ورحت عشان احاسب ولا وحده فيهم اوقفت يمي عند المحاسب ، ودفعت الفلوس وعطيت المحاسب قيمة القصص وبعدين مشيت وكملت مشواري في المعرض وقعدت اتجول واطالع بالكتب ... وعجبتني كتب عند مكتبه دينيه ولما ييت ادفع الفلوس وفتحت الجنطه تفاجأة ان البوك مختفي مو بالجنطه ... البوك مبيوق .

انا الي يومكم هذا وانا مستغربه اشلون البنات باقوني !!!


احتمال انها مدة ايدها لي وانا سلمتها بوكي بدون ما اشعر بنفسي .... لأن حصلت مع قريب لي انه انسرق عن طريق السحر قام وعطى الحرامي افلوسه بدون ما يحس ابنفسه بس مو بالكويت