ما ني عارفه شابدي بالكلام .... بس الموضوع ينعرف من عنوانه ، وانا بقول لكم عن معاناتي مع العين اللي صابت بنتي لما كانت صغيره .
لمن الله رزقني بولد على راس بنيتي فاطمه ، ولدي جميل ومملوح ما شاء الله تبارك الرحمن وبنتي تقريبا كان عمرها بحدود ثلاث سنوات ، حبيبت اني آخذ لهم صور تذكاريه عند استوديو التصوير مثلي مثل غيري اللي تفرح وتتمايز بعيالها امايز ..... ولبستهم من أحلى واكشخ المحلات ، واللي اهى ملابس العيد ، يمكن كان حزتها عيد الفطر ، ورحت انا والابو ودينا بنيتنا صالون للاطفال عشان يضبطون شعرها ، شوي قص من شعرها وسنع وضبط شعرها بالاستشوار ، وبطلعتنا واحنا رايحين نتغدى في مطعم .... مرينا على المصور ، وصورنا عيالنا أحلى صور .
ومن فرحتي بصور عيالي اول ما طلعناهم ... في اليوم الثاني على طول أخذت الصور معاي الدوام عشان اواري رفيجاتي صور عيالي ، جان تمر وحده من الاداره قسمنا واول ما شفتها على طول راويتها الصور ، ومن اول نظره اشهقت وقالت : شعر بنتج واااااااااايد .
ومن يومههههههها شعر بنتي قام يتساقط بشكل رهيييييييب .... بنتي قرررررررررعت .... وخصوصا مقدمة راسها ، وانا وزوجي صرنا بين حانه ومانه وحتى علاج الطبيب ما نفع ، ويروح زوجي ويشتري لها من العطار خلطة زيوت للشعر ، تدرون شنو نتيجة خلطة الزيوت !!!! الخلطه احرقت شعر بنتي ، قلنا ماكو الا انقص شعرها ، ولما قصينا شعرها جان يصير شعرها متنتف ، احترنا ياربي شلي جرى في بنيتنا ، عشنا بحاله يرثى لها ، أطالع بنيتي وانا ضايق خلقي ، شكلها يكسر الخاطر .... من كثر التفكير بالمعاناة اللي إحنا فيها اهنى حسيت ان عين ما صلت على النبي صابت بنيتنا ، قلت ماكو الا فلانه اللي اشهقت اهى اللي احرقت شعر بنتي من عينها الحاره ، ورحت على طول وقمت أقرى على بنتي المعوذات وحزت امسيان قبل غروب الشمس ، بس القرايه يبيلها صبر وطولة بال .
وفي يوم من الايام وانا في مكتبي في الدوام ولا تمر النظاله ام العين الحاره ، استغليت جيتها عندنا في القسم وصدتها صيد ، وجريتها بالسوالف وقدمت لها كلاص ماي ، واهى على طول خذت الماى وشربته بس اشوه انها ما شربته كله ..... واول ما مشت انا على طول أخذت الماى اللي من عقبها وصبيته في بطل ماى فاضي وبعدين أخذت الماى معاي البيت وسقيت بنيتي الماى اللي من عقب الحسوده ، وقسما بالله العلي العظيم ان شعرها قام ينب بشكل ملحوظ ورجع مثل ماكان ... أهني ارتاحت نفسيتي وزوجي لما درى ان هذا اللي حصل كله من العين ، وخذرني اني ما اراوي الناس اصور عيالي .
وصج ان اللحين الحمد لله بنيتنا اكبرة وصارت احلويه وشعرها كثيف وطويل بس انا انقهر كل ما شفت صورها لما كانت صغيره وشعر راسها متنتف واقرع من جدام
ليست هناك تعليقات:
إرسال تعليق