الأصنصير

...تعرفون الاصنصير اللي له بابين . باب خلفي وباب امامي .

واحنا كنا رايحين المسجد . وطبعا المكان المخصص للنساء في الطابق العلوي ، وامي الله يطول في عمرها ما تقدر تصعد الدري ، ركبنا الاصنصير ولما وصل الاصنصير مافتح الباب ...... امي قعدت الطق في الباب وتصرخ ... الباب مو راضي يفتح !!!! وانا مع امي .. الباب مو راضي يفتح ، شوي ولا صوت بنيه صغيره تتكلم ،( الباب مفتوح ) التفتنا على الصوت ... ولا طلع الاصنصير له باب خلفي ومفتوح ، واليهال واقفين يطالعونا

تخيلوا المنظر .. الباب مفتوح ، واحنا معطين ظهرنا الباب ، و نصرخ .. ( الباب مو راضي يفتح ) ، واليهال واقفين يطالعونا .

مسجات بالخطأ

عندي سالفه تقرقع في قلبي ودي اقولها ، سالفتي مع ناظره ادزلي مسجات بالخطأ .

مره من المرات وصلتني رساله تحيه وسلام في التلفون النقال ، رسالة طويله عريضه ربع ساعه وانا اقراها ... استغربت من نوعية الرساله ، والرقم غريب علي ، قلت انا حرام لازم انبه صاحب الرساله انه هو غلطان ، واتصل .. ولا طلعتلي حرمه ، قلت : اختي انتي دزيتي الرساله لي انا .. انتي غلطانه ، وردت عليي وعلى طول قالت : انا ناظره متقاعده والرساله دازتها حق ناظر زميل لي في العمل كنا نتلاقى في اجتماعات ، احنا دايما تصير عندنا اجتماعات للنظار ، قلت حق الناظره : طيب انتي دازه الرساله لي انا بالخطأ ....

( مصيبه ... كارثه .... يوم قلت حق الناظره انتي غلطانه ) وقامت تهذر عليي ساعه في التلفون النقال وبالآخر طلعتني انا اللي الغلطانه مو اهي ..

وبعدها بيومين ، نفس الطريقه ، وصلتني رساله كلها تحيه وسلام طويله عريضه ربع ساعه وانا اقراها ، واطالع الرقم .. ولا نفسها الناظره ... وارجع اتصل عليها علشان انبهها ... وعادت علي نفس الموال .... ونفس الشي طلعت انا اللي غلطانه واهى الصاجه

وطبعا الناظره ما وقفت من ارسال الرسائل لي ... بس انا اللتزمت الصمت ما قمت ارد عليها

وتالي ما اتوعيت ولا انها متصله علي ، وتعتذر مني واعترفت لي انها غلطانه ( انا مثل اتبلمت شلون ناظره أدق علي تلفون وتعتذر مني ) وقالت انا بعرفج على نفسي .. انا اخت الشيخ صالح النهام ... تعرفينه ؟ قلت لها اي ... اعرفه .


سبحنان الله .. نفس بنبرة الصوت .. بس على حرمه .

القلق والخوف

عن الامام علي عليه السلام قال : كل معدود منقوص وكل متوقع آت ، ثبت علميا ومن الناحيه النفسيه انك اذا توقعت شيئ معين راح يتحقق ، وهذا ما حصل معاي .... ومن أسوء توقعاتي ):

انا وحده عايشه حياتي بقلق وخوف من الزهيويه ( الصراصير ) ، لو طلع ازهيوي جدام عيوني راح يسبب لي هلع وخوف خصوصا اذا شفته يركض جدامي ، هالحشره امسببه لي قلق كله خايفه لا يطلع لي ازهيوي عندي في البيت ، وكل ما ادخل الحمام لازم اقعد اجيك واطالع مني ومناك السقف والباب والمرحاض والدوش ،ومن قرادتي ما يطلع لي الا وانا على غفله ، ماكو .. عقده نفسيه فيني .

ولا قمت من فراشي تالي الليل ، اقعد افكر وأقول بيني وبين نفسي لو يطلع ازهيوي بالظلمه جان ادوسه بالرجولي وامشي عنه بدون ما احس>_< قلق خوف عقده نفسيه وسواس كل شي فيني بسبة الزهيوي .

وفي ذاك اليوم ومع أذان الفجر وأول ماطق المنبه ( صك راسي صك صوت هالمنبه ) قمت وفزيت على طولي وقعدت أخبط بالهظلمه ، دخلت الحمام وتوضيت ، واقعد اخبط ويالله بالقصب لقيت السجاده ، خرمس ظلمه .... وتالي صليت فريضة الفجر وعينت من الله خير وبعدين رجعت كملت نومتي .

وتالي اول ما سفرت الدنيا وصحيت من ارقادي وفزيت من الفراش ، ولا ذااااااك الزهيوي مفقوص بالأرض فقاص ، حجمه كبيييييير ، جان أصرخ من قمة راسي ، اشعقبه .... عقب ما دسته وفقصته تحت الرجولي فقاص .

كيكة السبال (فول سوداني)

مقادير الكيكه
٤ بيض
كوب طحين
اربع ملاعق كبيره مسحوق الكاكاو غير محلى
نصف كوب دهن
ثلاث أرباع كوب سكر
ربع كوب حليب سائل
بيكن بودر

كريمة السبال ( فول سوداني)
علبة واحده جبن فلاديلفيا قليل الدسم ٢٠٠ غ
نصف زبده لينه
ثلاث أرباع كوب سكر ناعم
خمس ملاعق كبيره مليئه زبدة سبال خشن

للتزيين
كوب ونصف كاكاو آرو مقطع قطع صغيره
نصف زبده

تحضير الكعكه
اولا يحمى الفرن
تنخل المقادير الجافه ما عدا السكر مرتين بالمنخل
يخفق البيض بالخفاقه الكهربائيه جيدا ثم يضاف السكر والزيت والحليب ويستمر بالخفق الى ان يمتزج تماماً ثم يضاف الطحين تدريجيا مع الاستمرار بالخفق .
نصب الخليط في إناء متوسط الحجم وندخله الفرن بحراره متوسطه ولمدة ٤٥ دقيقه .

تحضير كريمة السبال (فول سوداني)
تخفق الجبنه مع الزبده مع السكر بخفاقة الكريمه الى ان تصبح كريمه ثم نضيف السبال ونستمر بالخفق ( أجعلي السبال يمتزج جيدا ).

ثم نصب الخليط فوقه الكعكه بعد ان تبرد بالخارج ثم ندخلها الثلاجه

للتزين
تذاب الزبده على النار ثم نضيف الكاكاو الى ان يذوب
يصب الكاكاو السائل فوق الكعكه

وبالهنا والشفا

كل تعلومه بطراق

أنا ما ني عارفه شلون ابدي بالموضوع ، بس أنا بطرح عليكم مشكلتي مباشرة وبدون مقدمه .

الله يسلمكم أنا من تزوجت الى يومي هذا وانا دايما أضيف أقارب زوجي اللي يسيرون علينا من السعوديه .... وكل بين فتره وفتره دقوا علينا من السعوديه ويلا راح نجي الكويت وتسوق وتشري ... واحنا اللي انضيفهم ونقوم بالواجب ، بس اشهالواجب اللي أنا اقوم فيه حق ضيوفنا ، مااااااكو تنسيق كلش ، لويه وعفيسه ، عيل ابذمتكم اكو وحده ما تجهز الحلو والشاي والقهوه الا حزة الحزه .... هذه أنا .

ولا العشا بالليل سندويشات من المطاعم .... خوش ضيافه ، والحلو ما ضبط عندي غير مرتين او ثلاث هذا اذا ما جبنا الحلو من الكنفاني ، ولا اطلعوا الضحى من عقب الريوق ... شلت شلايلي ورحت الدوام بدال ما اقعد البيت وانسق الشغل ، هذا غير المواقف المحرجه الا حصلت معانا خلال الضيافه

باختصار شديد ضيافتي مو منظمه موووووليه ، ما حسيت ابنفسي واشكنت اسوي ولا عرفت اشلون انسق وانظم شغلي الا مع اخر ضيوف جوني في الآونه الاخيره ، قبلها بيوم جهزت الحلو واواني التقديم من كاسات وصواني وبيالات ومطارات وكل مستلزمات الضيافه حتى الايدام جهزته من الليل .

أهني ضيافتي صارت منظمه وحتى أنا ارتحت من اللويه ، الا ان هم في شي خرب علينا الضيافه واللي اهو الحلو وقت التقديم طلع فاشل ..... والحلو اهو جلي المنجه ، اوهو المفروض ان يكون على شكل طبقات الا ان وقت التقديم طلع مو متماسك وساح على بعضه .

ومن هاللحظه هذه قلت أنا لازم ادخل ابمجال الطبخ .... لازم امارس الطبخ في أوقات فراغي عشان تخف ايدي على الطباخ واعرف شلون أضيف على اللي يسيرون علينا ، وقررت أني اشتري عجانه ... بس مو اي عجانه وبس ! آلة العجن من النوعاية الاصليه والفاخره ، ولما رحت محل للاكترونيات ولا اللي في بالي طلعت خالصه بس ما علي ، الطبخ ما يتوقف على الآلات ، راح ابدي بطبخ الحلويات والمعجنات الى ان احصل عليها .

واللحين راح أحط لكم وصفه حصلت عليها من موقع امريكي ، سويتها امس ... واللي واهى كوكيز الشوكولاته ، بس هالكوكيز مال أعياد يهود امريكا ، ولحد يزعل على طاري اليهود .... إحنا كلنا عيال ادم وحواء وكلنا اصحاب كتب سماويه ، ومثل ما قال الامام علي سلام الله عليه : الناس صنفان اما اخ لك في الدين او مثيل لك في الخلق .

طريقة كوكيز الكاكاو مع تصويري الشخصي :

اصبع واحد زبده لينه مزجتها بالملعقه الخشبيه مع كوبين سكر وزياده ٢ ملاعق من السكر .

وبعدين ضفت علي الخليط بيضه وحده كبيره وذرة ملح واستمريت بالخفق الى ان امتزج تماماً .

ضفت على المزيج السائل كوب واحد كاكاو بودر غير محلى المخصص للحلويات + نص كوب طحين وزياده ثلاث ملاعق من الطحين .

واستمريت بالخفق جان أجي واعجن بأيدي ولا ايدي تملغطت من الخليط وصارت ايدي كلها كاكاو ... امبي لأ لأ مو جذي ، جان أغسل ايدي وارجع أخلط بالملعقه الخشبيه الا ان صارة كتله وحده .

بعدين حطيت العجينه في مكان مسطح ، وضغطت عليها شويه بعدين رقيتها وخليتها بارتفاع سانتي ، وقطعتها على شكل دوائر بالقطاعه .

ورشيت عليها شكر من جميع النواحي ، وصفيته بصينيه ودخلته الفرن من فوق على الشعله السفليه.... اهو المفروض ان عشر دقائق وما انذكر انه تنخفض حرارة الفرن، بس انه ذاب السكر من الاسفل باقل من عشر دقاق وصار غامج من تحت وعلى وشك انه يحترق .

ما ادري يمكن حجم حبات الكوكيز صغيره ، بس طلع لذيذ ومو مبين طعم الشكر المحترق وطعمه غني بنكهة الكاكاو ، يلا المره الجايه راح اضبطها ، وكل تعلومه بطراق .

رحلة جزيرة بوبيان

رحلة جزيرة بوبيان

هالمره هذه راح اذكر لكم ذكرياتي عن رحلة جزيرة بوبيان ، بس هالجزيره مو اى جزيره وبس .... هذه جزيرة بوبيان أقروا قصتي وراح تعرفون شنو اهى جزيرة بوبيان .

اذكر يوم انا كنت اصغيره في المرحله الابتدائيه ، جانا ابوي الله يرحمه وقال لنا ان مفتتحين جسر الصبيه المؤدي الى جزيرة بوبيان ، وقال لنا وهوه مستانس : انشاء الله راح اوديكم جزيرة بوبيان ..... وبعدين قرر ان ياخذ معانا عمتي الارمله الله يرحمها معانا حق الكشته ، طبعا وكالعاده أمي قامت تتحلطم وتقول : أشتهي لوووو مررررره وحده اطلعنا بروحنا ، ابوي الله يرحمه تضايق بس ما اهتم حق كلامها .

وفي نهاية الاسبوع امي زهبت الغدا وماجلة الكشته وتبدلنا وتزهبنا ..... بس إحنا البنات بروحنا ، اخواني بالنسبة لنا اكبار كانوا شباب في وقتها حتى الكبير كان متزوج وعنده ولد اصغير ما ادري اصغر اخواني جي معانا او لا مو متذكره عدل ، وركبنا سيارة ابوي الله يرحمه كان توه مفتتحها مديلها يديد في يومها واللي اهى سيارة سوبر جمس لونها حمرا ، ومر بيت عمتي الله يرحمها ..... ماغير عمتي وبنتها الصغيره ولا باجي عيالها ظلوا في البيت ما جو معانا .

وقضبنا الجاده ومشينا طريجنا الى ان وصلنا جسر الصبيه وتالي دخلنا جزيرة بوبيان .... وظل ابوي يدور فينا بالسياره يدور لنا مكان ينقعد فيه ، ظل يدور فينا بين الطين والاوحال يالله اهني لقينا مكان جاف ينقعد فيه .. رمل ونباتات صحراويه ، نزلنا وفرشنا الحصير قامت أمي وانجبت الغدا وقعدنا كلنا وتجابلنا على الغدا وكان الجو يهبل وكافي ان إحنا قاعدين في جزيره ، ولعب وتمشي وامي وعمتي تجابلوا سوالف وطق حنج ومر الوقت وبدت تغيب الشمس ، ويوم أدى المسيان ما اوتعينا الا صاروخ مر فوقنا وتالي مر صاروخ ثاني بالاتجاه المعاكس ..... أمي وعمتي الله يرحمها تفازعوا وقامت أمي تصرخ : واي واي يمه يمه وقامت تصارخ على ابوي واهى خايفه : ردنا البيت ردنا البيت ، وانا وابوي واقفين رافعين روسنا وانطالع تبادل اطلاق الصواريخ ، ماكو صاروخ رايح وصاروخ راد .... صاروخ رايح وصاروخ راد ، وامي تزقع على ابوي وتقول : اقول لك ردنا البيت ، وبعدين ابوي لما شاف أمي وعمتي شلون مختبصين جان يقول : يلا امشوا خل نرد البيت وامي تشيل الكش والاقراض واهى خايفه تتراعد وعمتي تساعدها ، وقب فينا ابوي وطلعنا من جزيرة بوبيان ومشى فينا بالطريق الى ان وصلنا البيت .

طبعا هالصواريخ اللي مرت فوق روسنا ليست الا عباره عن تبادل اطلاق النار بين الجيش الايراني والجيش العراقي في الحرب اللي صارت بينهم في ايام الثمانينات .


عرفتوا اللحين شنو اهو موقع جزيرة بوبيان ؟

من شر حاسد اذا حسد ( الجزء الثاني )

ومن شر حاسد اذا حسد ( الجزء الثاني )

هل يا ترى الحسد يختلف عن العين ؟؟؟ ممكن ان الحسد يختلف عن العين ، بس ...... العين هي نتيجة الحسد ، طيب هل في اختلاف بين العين والنفس ؟
مجرد تساؤلات لا اقل ولا اكثر ، بس أكيد كلكم تعرفون شنو اهى نتيجة العين ...في عين تحرق ... في عين تمرض ... في عين تموت ، على قولتهم فلان عينه والقبر ، الله يكافينا شر هالعين .... بس سمعتوا ان في عين تجلب الحشرات !!!!

من اول ما نزلت البيت الجديد ومن بعد فتره ، سيروا علي ثنتين من صاحباتي اهم وعيالهم وخادماتهم .... وقضينا أوقاتنا بتبادل الأحاديث ، من خلال هالزياره كانوا الخادمات طول وقتهم قاعدين في المطبخ ..... ومر الوقت والقعده معاهم كانت ممتعه لو ما ان ولد وحده فيهم مشاغب ، ومن شطانته ما اطلعوا الا امكسر علي قلاصات التقديم ... وبطلعتهم قالت لي وحده فيهم ان الخادمه ابدت اعجابها الشديد في المطبخ وقالت : المطبخ واجد واجد هلو ..... برايكم شلي حصل لي من بعد ما طلعوا صاحباتي !!!!

اللي حصل ان في اليوم التالي واول ما قعدت من الرقاد ، ولا حشره طائره صغيره تدخل غرفت النوم وتوقف على التسريحه ... قعدت أطالع الحشره باستغراب ، ولما طلعت من غرفت النوم ولا الصاله كلها حشرات صغيره تطير كانها برغش ولا هى ببرغش .... دخلت المطبخ عشان اجهز الريوق ولا المطبخ مترررررروس من هالحشرات ... ضباب من هالحشرات ضباب ، من كثره منتشر عندي في البيت ... الغرف والممرات والحمامات ، مزعج منظر هالحشرات ، وما كان علي الا ان اقضي عليهم بالمبيد الحشري ، وارش المبيد ولا جني راشه مبيد حشري ، وتمر الايام والليالي والحشرات مثل ما اهى ومن كثرهم قاموا يطبون حتى على الاكل اغطي الاكل ولا ما اغطيه نفش الشي .... قلت ماكو الا ابخر بعلج اللبان لان الدخان معروف بابعاد الحشرات ، هم ماكو فايده الوضع مثل ما اهو ..... اكثر من سنه وانا أعاني من هالحشرات .... لدرجة اني قمت الاحظهم شلون يتزاوجون ..... انزعجت وايد وايد انزعجت ، قمت استعمل وسيلة الضرب ... قمت وشكيت الحال حق اختي بخصوص الحشرات وقالت لي : لازم يكون لهم مكان معين للتكاثر ، اقضي على مكان تكاثرهم وإنشاء الله تنقطع الحشرات في المطبخ ...... انا على طول رحت المطبخ وتتبعت مكان تكاثرهم واهني اكتشفت انهم يتكاثرون في الاماكن الرطبه مثل مغسلة المواعين ، قمت ونشفت الرطوبه من المغسله .... مثل اللي خفت يوم يومين بعدين ارجعت مره ثانيه .... اثاري لقت اماكن ثانيه للتكاثر مثل احواض الزرع ، ونفس الشي قمت وقضيت على الرطوبه من احواض الزرع ، وتالي اكتشفت انهم قاموا يتكاثرون في البالوعه ، يا ربي .... بلوى ابتليت فيها بلوى ، شسوي في عمري ياربي شسوي .....

اهني امي عرفت لي لما شافتني شلون انا مبتليه واعاني من كثرة هالحشرات عندي في البيت وقالت لي هذي جايتج عين ما صلت على النبي ، ماكو غير اخت رجلج عطتج عين على مطبخج ( لا مو اخت زوجي .... اللي عطت مطبخي عين اهى خادمة صاحبتي ) ، وعلى يوم وحزت امسيان وقبل أذان المغرب أخذت المصحف وقعدت في المطبخ وقريت سورة البقره ولمدة ثلاثة ايام على اتلى ، وكل بين فتره وفتره ادخل المطبخ واقرأ المعوذات وابخر في الشب والحرمل ..... ويالله اهني خفت الحشرات بالقرايه بس من بعد مده طويله وما دارت السنه الا وبقت بقايا بسيطه ..... لمن انقطعت مع مرور الايام والليالي .... بس بصراحه هذه كانت بلوى انا ابتليت فيها من العين اللي جابت لي الحشرات في المطبخ .

عين تجلب الحشرات ولا عين تموت ...... والحمد لله رب العالمين على كل حال .